Ja hérna!

Þá er búið að banna dónunum að koma til landsins. Ég á nú bara ekki orð. Þessi ættbálkur er stundum alveg spinnegal.

Þetta fólk er ekki á sakaskrá, þetta eru ekki meiri glæpamenn en allir ritstjórar Bleikt og Blátt til samans... þetta eru bara dónar sem vinna við framleiðslu á dónaskap. Kannski eitthvað sem höfðar ekki til allra, en hvað kemur okkur það við? Það er ekki eins og það sé um morð að ræða eða álíka hrylling. Er þetta ekki bara kynlíf á mynd sem málið snýst um?

Ef þetta eru þrælahaldarar, mansalar og menn sem níðast á börnum... og það hefur verið sannað og dæmt... þá ok... þá kannski væri hægt að segja þeim að éta það sem úti frýs, en ég held því miður að svo sé ekki. Þetta er Falun Gong tvö og það var nú einhver sá mesti ömurleikafarsi sem ég hef séð.

Ég er þakklát og glöð að guð lét mig fæðast á Íslandi en stundum skammast ég mín hálfpartinn fyrir þann kjánagang og seinþroska sem hér viðgengst. Hvar annarsstaðar í heiminum hefði þetta geta gerst? Kannski í Færeyjum? Kannski í einhverju öðru landi þar sem fólk át roð og súr, nauðgaði vinnukonum, sá einu sinni útlending (bretana í Stanley leiðangrinum) og missti tennurnar um tvítugt í 500 ár. En ekki hjá neinni raunverulega siðmenntaðri þjóð... Bara þykjustu siðmenntaðri þjóð þar sem hver keppir við annan í pólitískri rétthugsun, en lætur svo klámfengna "mannasiði", tvískinnungshátt og hræsni tröllríða öllu í heila tíu daga.

Svei! Já, svei segi ég!

Áhugasömum um uppruna okkar undarlega hugsunarháttar bendi ég á þessa skemmtilegu úttekt eftir snillinginn Árna Björnsson um daglegt líf á 18 Öld.

PS. Svo er ég komin með nóg af Byrgisrugli, klámrugli, illmennum sem níðast á börnum í kynferðislegum tilgangi og öllu sem slíku tengist í bili. Þetta er búið að standa yfir í fjölmiðlum frá áramótum og þetta hlýtur að vera komið gott? Ha?
Er ekki hægt að koma með fréttir af álfunum í Hafnarfjarðarhrauni? Hvort þeir séu í samkeppni við íþróttaálfinn sem hlýtur að spranga þar um? Hvernig kunna þeir að meta IKEA? Hvað er að frétta af Jónu Rúnu Kvaran? Ég sá hana á bekk í Kringlunni í gær. Er hún enn alltaf að spjalla við framliðna? Kannski getur hún náð sambandi við Önnu Nicole? Það myndi nú skýra mart... smart...

Icelandic medium get´s in touch with Anna Nicole via lava gnomes in Hafnarfjordur village!