Vitundarvakning gegn fitu og flíspeysum

Í dag er dagurinn! Sannleikurinn er byrjaður að dreifa sér og birtist í dag á prenti en fram til dagsins í dag hélt ég mig eina í þessari herferð.

Já. Skoðanasystir mín talaði í Fréttablaðinu í dag. Sagðist hafa séð hóp af ungum, of feitum konum ganga niður götu allar íklæddar þessum ömurlegu "flíspeysum sem eru að verða þjóðbúningur okkar". Mér hlýnaði um hjartað. Þarna var komin kona sem mælti mín orð.

Vonandi fer almenningur smátt og smátt að gera sér það ljóst að þetta gengur ekki lengur. Það er ekki hægt að fitna bara og fitna og enda svo í einhverri ógeðslegri flíspeysu, látandi eins og allt sé bara í himnalagi. Fleiri pizzur! Meira diet kók!
Meira bráðnað plast til að halda hita á spikinu (flís er jú gert úr bræddu plasti)

Þegar ég var að læra ljósmyndun í Iðnskólanum blöskraði mér oftar en ekki ástandið á mannskapnum. Sérstaklega voru stelpurnar í hársnyrtideildinni ekki að gera sig á lúkkinu. Allar síspikaðar í flísi en samt með ógurlega trendí stuttar klippingar sem kröfðust þess að í væri úðað geli í grammavís. Sama má reyndar segja um förðunardömur, en þær eru upp til hópa allar allt of feitar.

Stelpur. Þetta er ekki að gera sig!

Ef svo vill til að þú sem ert að lesa þetta ert með svona 5+ extra kíló utan á þér og í flísi þá langar mig að biðja þig að gera eftirfarandi:

Stattu upp
Teygðu þig
Labbaðu inn í eldhús og tæmdu eftirfarandi úr skápunum:

Gosdrykki/bjór
Sælgæti
Tilbúna frosna rétti
Bakkelsi
Feita osta
Smjör

Hentu matnum eða gefðu bágstöddum og næst þegar þú ferð út í búð skaltu kaupa grænmeti, ávexti og allt sem kallast diet, light eða undir 17% í spik innihaldi.

Þegar þú ert búin að hreinsa eldhúsið, fáðu þér þá tóman kókbrúsa, fylltu af vatni og byrjaðu að þamba. Gangtu svo að fataskápnum þínum og dragðu fram buxurnar sem þú passaðir einu sinni í. Reyndu að komast í þær og finndu hvað þú þarft að losna við mikið spik.
Taktu upp símann og skráðu þig á námskeið eða í einhvern gönguhóp/dans/whatever sem þú getur hugsað þér að gera sem krefst smá hreyfingar.

Farðu úr flíspeysunni og settu hana hjá hinum útilegufötunum þínum, en flíspeysur eru samskonar fatnaður og kraftgallar eða pollagallar eða flotbúningur s.s. eitthvað sem maður klæðist við sérstök tilefni en ekki dags daglega.

Ef þú ert hard core þá bræðiru flíspeysuna úti á plani, en þær bráðna jú en brenna ekki út af plastinu.

Á næstu misserum spái ég því að flísið muni fá á sig aumingjastimpil sem verður til þess að það muni smátt og smátt hverfa úr menningu okkar. Og þær/þeir sem halda áfram að klæðast því munu falla í jaðarmenningahóp fólks sem í öðrum löndum kallast "white trash/trailer trash", eða hjólhýsa rusl. Hér: Flíspeysu plebbar.

Ef ég hef sært þig með þessum skrifum þá bið ég þig að afsaka mig. Ég er breysk. Ég veit það. En eitthvað verður maður að gera. Það er ekki hægt að umbera allt í sínu nánasta umhverfi. Stundum verður maður bara að setja fótinn í dyrnar og æpa HINGAÐ OG EKKI LENGRA! ÉG HEF FENGIÐ NÓG! ...eins og meðvirk kona í bata og neita að sætta sig við svona lágkúru.